పట్టపగలు డిగ్రీ విద్యార్థినిపై ప్రేమికుడు కత్తితో దాడి చేసిన ఘటన మెదక్ పట్టణంలో సంచలనంగా మారింది. పట్టణంలోని ప్రభుత్వ డిగ్రీ కళాశాలలో ఓ యువతి ఓపెన్ డిగ్రీ పరీక్షలు రాసేందుకు వచ్చింది. అక్కడే ఉన్న చేతన్ అనే యువకుడు ఆమెపై ఒక్కసారిగా దాడి చేశాడు. యువతిపై కత్తితో విచక్షణారహితంగా దాడి చేశాడు. యువతి ప్రేమించలేదని చేతన్ అనే యువకుడు కత్తితో దాడి చేశాడు. తనపై కత్తితో దాడి చేస్తున్న చేతన్‌ను యువతీ అడ్డుకునేందుకు ప్రయత్నించగా, చేతన్ ఆమెపై విరుచుకుపడ్డాడు. బాలిక గట్టిగా కేకలు వేయడంతో స్థానికులు ఆమెను రక్షించారు. ఈ ప్రమాదంలో యువతి చేతికి తీవ్ర గాయాలయ్యాయి. ఇది గమనించిన స్థానికులు ఆమెను సమీప ఆసుపత్రికి తరలించారు.
అక్కడ ఆమె పరిస్థితి విషమించడంతో కుటుంబ సభ్యులు మెరుగైన వైద్యం కోసం హైదరాబాద్‌కు తీసుకెళ్లారు. వెంటనే పోలీసులకు సమాచారం ఇచ్చారు. దీంతో సంఘటనా స్థలానికి చేరుకున్న పోలీసులు కేసు నమోదు చేసుకుని దర్యాప్తు ప్రారంభించారు. నిందితుడు చేతన్ పరారీలో ఉన్నట్లు పోలీసులు వెల్లడించారు. ఘటన స్థలాన్ని పరిశీలించి నిందితుడు వాడిన కత్తి, యువతి సెల్ ఫోన్ ని స్వాధీనం చేసుకున్నారు. ప్రత్యక్ష సాక్షులను అడిగి వివరాలు తెలుసుకుంటున్నారు. ఘటన స్థలం వద్ద సీసీ కెమెరాలు లేకపోవడంతో చుట్టుపక్కల సీసీ కెమెరాలు పరిశీలిస్తున్నారు. ఈ ఘటనపై పూర్తి వివరాలు తెలియాల్సి ఉంది.