కాకినాడ: రాజమహేంద్రవరం రూరల్‌ మండలం బొమ్మూరుకు చెందిన కె.సుధీర్‌కుమార్‌ అలియాస్‌ సిద్ధు (23) అనే యువకుడికి పోక్సో (లైంగిక నేరాల నుంచి బాలల రక్షణ) ప్రత్యేక కోర్టు రెండేళ్ల ఆరు నెలల జైలు శిక్ష, రూ.2,500 జరిమానా విధిస్తూ తీర్పునిచ్చింది. బొమ్మూరు పోలీసులు తెలిపిన వివరాల ప్రకారం.. 2020 జూలై 26వ తేదీ రాత్రి బాధిత బాలిక కిరాణా షాపుకు వెళ్లింది. నిందితుడు బలవంతంగా బాలిక చేతులు పట్టుకుని, తన బండిపైకి లాగి, బలవంతంగా ముద్దుపెట్టుకున్నాడు. జరిగిన విషయాన్ని తల్లిదండ్రులకు చెబితే చంపేస్తానని బాలికను బెదిరించాడు.
అయితే బాలిక తన తల్లికి సమాచారం ఇవ్వడంతో ఆమె బొమ్మూరు పోలీసులకు ఫిర్యాదు చేసింది. సబ్ ఇన్‌స్పెక్టర్ ఆర్.శివాజీ పోక్సో చట్టం కింద కేసు నమోదు చేసి దిశ పోలీస్ స్టేషన్‌కు బదిలీ చేశారు. పోక్సో కోర్టులో కేసు విచారణ అనంతరం పబ్లిక్ ప్రాసిక్యూటర్ పితాని శ్రీనివాసరావు పబ్లిక్ ప్రాసిక్యూటర్‌గా వాదించడంతో పోక్సో న్యాయమూర్తి నిందితుడికి 2.5 ఏళ్ల జైలు శిక్ష విధించారు. బాలికలను, మహిళలను ఎవరైనా వేధించే ప్రయత్నం చేస్తే కఠినంగా శిక్షిస్తామని తూర్పుగోదావరి పోలీసు సూపరింటెండెంట్‌ పి.జగదీష్‌ తెలిపారు. నిందితులను దోషులుగా నిర్ధారించేందుకు ఇటువంటి కేసులను ప్రత్యేకంగా పర్యవేక్షిస్తున్నట్లు ఆయన నొక్కి చెప్పారు.