వృద్ధుడి ప్రాణాన్ని బలి తీసుకున్న లిఫ్ట్. వివరాల్లోకి వెళ్తే, హైదరాబాద్‌ శివారులోని గుడిమల్కాపూర్‌లో ఈ విషాద ఘటన చోటు చేసుకుంది. రిటైర్డ్ ఫార్మసిస్ట్ అయిన 65 ఏళ్ల ఎంఎస్ సమియుల్లా బేగ్ స్థానిక ప్రియా కాలనీలో నివాసం ఉంటున్నారు. ఆదివారం సెలవు దినం కావడంతో కుటుంబ సభ్యులందరూ బయటకు వెళ్లగా ఇంట్లో భార్యాభర్తలిద్దరే ఉన్నారు. ఇటీవలే బేగ్ ఈ నెల 17న కేటరాక్ట్ సర్జరీ చేయించుకున్నారు. ఇంట్లో కూర్చుని బోరు కొట్టి కాసేపు అలా బయటకు వెళ్దామనుకున్న ఓ వృద్ధుడు ఊహించని విధంగా మృతి చెందాడు.
సాయంత్రం 5 గంటల సమయంలో బేగ్ తాముండే నాలుగో ఫ్లోర్ నుంచి కిందికి వెళ్లాలని అనుకుని లిఫ్ట్ బటన్‌ నొక్కాడు. అయితే లిఫ్ట్ రాకుండానే డోర్‌ తెరుచుకుంది. అది గమనించని ఆ పెద్దాయన అందులో కాలు పెట్టగానే అమాంతం కిందపడిపోయాడు. తీవ్రంగా గాయపడిన ఆయనను వెంటనే ఆసుపత్రికి తరలించారు. అయితే, అప్పటికే ఆయన మరణించినట్టు వైద్యులు తెలిపారు. కేసు నమోదు చేసుకున్న పోలీసులు దర్యాప్తు చేపట్టారు. ఈ ఘటన అపార్ట్‌మెంట్లలోని లిఫ్ట్‌ల పనితీరుపై ఆందోళనలు రేకెత్తిస్తోంది.