హైదరాబాద్: బీఆర్ఎస్ ఎమ్మెల్యేలను వేటాడేందుకు కాంగ్రెస్ చేస్తున్న ప్రయత్నాలకు తాజా ట్విస్ట్‌గా ఇటీవలే అధికార కాంగ్రెస్ పార్టీలో చేరిన గ‌ద్వాల ఎమ్మెల్యే బండ్ల కృష్ణ‌మోహ‌న్ రెడ్డి తన మ‌న‌సు మార్చుకొని సొంత గూటికి చేరుకున్నారు. గద్వాల్ ఎమ్మెల్యే బండ్ల కృష్ణ‌మోహ‌న్ రెడ్డి వర్కింగ్ ప్రెసిడెంట్ కేటీఆర్ సమక్షంలో బీఆర్ఎస్ లో కొనసాగుతాన‌ని స్పష్టం చేశారు. అసెంబ్లీ ప్రాంగణంలో రెండవ విడత రైతు రుణమాఫీ మొత్తాన్ని విడుదల చేసే సంబరాల్లో కాంగ్రెస్ బిజీగా ఉన్న నేపథ్యంలో కూడా ఆయన తన నిర్ణయాన్ని ప్రకటించారు.
జులై 6న ముఖ్యమంత్రి, రేవంత్ రెడ్డి సమక్షంలో గ‌ద్వాల ఎమ్మెల్యే బండ్ల కృష్ణ‌మోహ‌న్ రెడ్డి కాంగ్రెస్ కండువా క‌ప్పుకున్న సంగ‌తి తెలిసిందే. అయితే, ఆయన పార్టీ పట్ల అసంతృప్తితో ఉన్నారని, తన నిర్ణయంపై విచారం వ్యక్తం చేశారని సమాచారం. అయితే ఎమ్మెల్యే కృష్ణ‌మోహ‌న్ రెడ్డి కాంగ్రెస్ పార్టీలో చేర‌డానికి ప్ర‌ధాన కార‌ణం జూప‌ల్లి కృష్ణారావు అని పలు వార్త‌లు వినిపించిన సంగ‌తి తెలిసిందే. అధికార కాంగ్రెస్‌కు విధేయులుగా మారిన మరో తొమ్మిది మంది ఎమ్మెల్యేల్లో మెజారిటీ కూడా తిరిగి బీఆర్‌ఎస్‌లోకి వస్తారని బీఆర్ఎస్ నేతలు ఆశాభావం వ్యక్తం చేశారు.