హైదరాబాద్: రాష్ట్రంలోని రైతులకు రూ.2 లక్షల రుణమాఫీ, ఎన్నికల్లో ఇచ్చిన ఆరు గ్యారెంటీలు, అందులోని 13 హామీలును కాంగ్రెస్ ప్రభుత్వం ఆగస్టు 15వ తేదీ నాటికి పూర్తిగా అమలు చేస్తే, తన ఎమ్మెల్యే పదవికి రాజీనామా చేసేందుకు సిద్ధమేనని మాజీ మంత్రి తన్నీరు హరీశ్రావు మరోసారి ప్రకటించారు. నేను రాజీనామాకు సిద్ధం, చేయని పక్షంలో నువ్వు సిద్ధమా..? అంటూ సీఎం రేవంత్ రెడ్డికి సవాల్ విసిరారు.
అప్పుడు వెన్నుచూపి పారిపోయింది తమరు!
సిఎం రేవంత్ రెడ్డి గారూ! తెలంగాణ ఉద్యమ సమయంలో పదవికి రాజీనామా చేయకుండా వెన్నుచూపి పారిపోయింది తమరు. కొడంగల్ లో ఓడిపోతే రాజకీయ సన్యాసం చేస్తానని ప్రకటించి, వెన్నుచూపి పారిపోయింది తమరు. రేవంత్ రెడ్డి గారు, నిరంతరంగా పారిపోయిన చరిత్ర నీది, అనునిత్యం ప్రజల పక్షాన నిలిచిన చరిత్ర నాది. పదవుల కోసం మీరు పెదవులు మూసుకొని కూర్చుంటే, మంత్రి, ఎమ్మెల్యే పదవులను సైతం తృణ ప్రాయంగా భావించి రాజీనామా చేసిన చరిత్ర నాది. నాకు పదవులు కొత్త కాదు, రాజీనామాలు కొత్త కాదు. ప్రజలకు, రైతులకు, పేదలకు, అణగారిన వర్గాలకు నా వల్ల మంచి జరుగుతుంది అంటే నేను ఎన్నిసార్లు పదవులకు రాజీనామా చేయడానికైనా వెనుకాడను అని హరీశ్ రావు పేర్కొన్నారు. ఈ మేరకు ఆయన సోషల్ మీడియా వేదికగా ప్రకటన విడుదల చేశారు.