తెలంగాణలోని వనపర్తి జిల్లాలో సోమవారం తెల్లవారుజామున కారు చెట్టును ఢీకొనడంతో ఐదుగురు వ్యక్తులు మృతి చెందారు.హైదరాబాద్-బెంగళూరు జాతీయ రహదారిపై కొత్తకోట సమీపంలో వేగంగా వస్తున్న కారు అదుపు తప్పి రోడ్డుపక్కన ఉన్న చెట్టును ఢీకొట్టడంతో ఈ ప్రమాదం జరిగింది. ఈ ఘటనలో మరో ఏడుగురు గాయపడ్డారు. మృతి చెందిన వారిలో ముగ్గురు చిన్నారులు ఉన్నారు. మృతులను యాసిర్ (7 నెలలు), బుష్రా (2 సంవత్సరాలు), మారియా (5 సంవత్సరాలు), అబ్దుల్ రెహ్మాన్ (62), సలీమా బీ (85)గా గుర్తించారు.
క్షతగాత్రులను ఆస్పత్రికి తరలించగా వారిలో ముగ్గురి పరిస్థితి విషమంగా ఉన్నట్లు సమాచారం. గాయపడిన వారిని సమీరా (5), హుస్సేన్ (10), సహ్ఫీ, ఖదీరున్నీసా, హబీబ్, అలీ, షాజన్ బేగ్‌లుగా గుర్తించారు. గాయపడిన వారిలో ఆరుగురిని ఆంధ్రప్రదేశ్‌లోని కర్నూలు ఆసుపత్రికి తరలించారు. ఒకరిని వనపర్తి ఆసుపత్రిలో చేర్చారు. బాధితులు కర్ణాటకలోని బళ్లారి జిల్లాకు చెందినవారు. హైదరాబాద్‌లో ఓ వివాహానికి హాజరైన కుటుంబం బళ్లారికి తిరిగి వస్తోంది.
పోలీసులు తెలిపిన వివరాల ప్రకారం తెల్లవారుజామున 2.30 గంటల నుంచి 3 గంటల మధ్య కారులో 12 మంది ప్రయాణిస్తున్నారు. డ్రైవర్ నిద్రమత్తులో ఉండడం వల్లే ప్రమాదం జరిగినట్లు పోలీసులు అనుమానిస్తున్నారు. ఢీకొన్న ఘటనలో కారు పూర్తిగా నుజ్జునుజ్జయింది. మృతదేహాలను బయటకు తీయడానికి, క్షతగాత్రులను రక్షించేందుకు సహాయక సిబ్బంది గంటకు పైగా శ్రమించాల్సి వచ్చింది.