హైదరాబాద్ నగరంలోని అనేక ప్రాంతాల్లో వర్షాలు కురిసే అవకాశం ఉంది. వాతావరణంలో వచ్చిన మార్పు కారణంగా నగరంతో పాటు తెలంగాణలోని అనేక జిల్లాల్లో ఉరుములు, మెరుపులతో కూడిన వర్షాలు కురుస్తున్నాయి. కాగా, హైదరాబాద్ పరిధిలో బోరబండా, మాదాపూర్, నిజాంపేట్, బాచుపల్లి, ప్రగతి నగర్, జూబ్లిహిల్స్, సుల్తాన్ పూర్, మల్లంపేట్, గండి మైసమ్మ పరిసర ప్రాంతాలలో వర్షం కురుస్తుంది. అయితే, గత కొన్ని రోజులుగా నగరంలో ఎండలు తీవ్రరూపం దాల్చాయి. ఉదయం నుంచే భానుడు తన ప్రతాపం చూపుతున్నారు. దీంతో పట్నం ప్రజలు తీవ్ర ఇబ్బందులు పడుతున్నారు. మరోవైపు రోడ్లపై వర్షం నీటితో పలు ప్రాంతాల్లో ట్రాఫిక్ నిలిచిపోయింది.
ఎండలతో మండిపోతున్న వేళ తెలంగాణలోని ఆసిఫాబాద్, కామారెడ్డి, సంగారెడ్డి, రంగారెడ్డి, వికారాబాద్, నిజామాబాద్‌, నిర్మల్ జిల్లాలో వర్షం కురుస్తుంది. ఈ ఆకాల వర్షాలు కురుస్తుండటంతో చేతికి వచ్చిన పంటలు నాశనం అవుతున్నాయని రైతున్నలు ఆవేదన వ్యక్తం చేస్తున్నారు. వడగండ్ల వానలు పడుతుండటంతో వరి, మామిడి, చెరుకు పంటలు తీవ్రంగా నష్టపోయాయి.