విశాఖపట్నంలోని డైనోసార్ పార్క్ లో అగ్ని ప్రమాదం జరిగింది. ఆర్కే బీచ్ రోడ్ లో ఉన్న ఈ పార్క్ లో మంటలు ఎగిసిపడుతున్నాయి. భారీగా పొగ వెలువడుతుండడంతో స్థానికుల్లో భయాందోళనలు వ్యక్తమవుతున్నాయి. బీచ్ వద్ద ఉన్న పర్యాటకులు భయాందోళనలతో పరుగులు తీశారు. అగ్నిప్రమాదంపై స్థానికులు సమాచారం అందించగా. అగ్నిమాపక సిబ్బంది వెంటనే అక్కడికి చేరుకుని మంటలు ఆర్పేందుకు ప్రయత్నించారు. బీచ్ రోడ్డు పక్కనే ఉన్న డైనోసార్ పార్క్ లో ఈ ప్రమాదం జరిగింది. పెద్ద ఎత్తున మంటలు, పొగ ఎగిసి పడుతుండడంతో రోడ్డుపై ట్రాఫిక్ కు అంతరాయం కలుగుతోంది. ప్రస్తుతం మంటలు అదుపులోకి వచ్చినట్లు సమాచారం. కాగా, ఈ అగ్ని ప్రమాదం ఎలా జరిగిందనే వివరాలు తెలియరాలేదని అధికారులు చెప్పారు. నష్టం లక్షల్లో ఉంటుందని ప్రాధమికంగా అంచనా వేస్తున్నారు.