కార్తీ మరియు అరవింద్ స్వామి ప్రధాన పాత్రలలో సత్యం సుందరం పూర్తి ఎంటర్టైనర్ సినిమా. ఇక్కడ హీరోలుగా ఎందుకు సంబోధించలేదు అంటే సినిమాలో వాళ్ళు నటించలేదు జీవించారు. సినిమా చేస్తున్నంత సేపు కార్తీ, అరవింద్ స్వామిలు హీరోలుగా కాకుండా మన కుటుంబ సభ్యులుగా అనిపిస్తారంటే అతిశయోక్తి కాదు. 96 వంటి సూపర్ హిట్ సినిమాకి దర్శకత్వం వహించిన సి ప్రేమ్ కుమార్ దర్శకత్వం వహించారు. 2డి ఎంటర్‌టైన్‌మెంట్ బ్యానర్‌పై సూర్య మరియు జ్యోతిక నిర్మించారు. ఈ సినిమా సెప్టెంబర్ 28న థియేటర్లలో విడుదలై సూపర్ హిట్ అయింది. కార్తీ, అరవింద్ స్వామి అన్నదమ్ములుగా కుటుంబ బంధాల విలువలను తెలియజేస్తూ ప్రేక్షకులను కంటతడి పెట్టించారు. దీన్ని తెలుగులో ఏషియన్ సురేష్ ఎంటర్‌టైన్‌మెంట్స్ విడుదల చేసింది.
తాజాగా ఈ సినిమా ప్రముఖ ఓటీటీ సంస్థ నెట్ ఫ్లిక్స్ లో విడుదల అయింది. రిలీజ్ అయిన నాటి నుండి ప్రేక్షకుల నుండి విశేష ఆదరణ తెచ్చుకుంది సత్యం సుందరం. ఇలాంటి సినిమాలు ఎప్పుడంటే అప్పుడు రావు చాలా అరుదుగా మాత్రమే వస్తాయని నెటిజన్స్ కామెంట్స్ చేస్తున్నారు. ఇక ఈ సినిమాలో సుందరం పాత్రలో నటించిన కార్తీ అద్భుతంగా జీవించి ఇలాంటి మనిషి ప్రతి ఒక్కరి జీవితంలో ఉండాలి అనిపించేంతగా ప్రతి ఒకరిని కదిలించింది అని మరికొందరు కామెంట్స్ చేస్తున్నారు. ఇలాంటి సినిమాలు మరిన్నిరావాలి. ఉద్యోగం, డబ్బు సంపాదనలో పడి మనుషులకు దూరంఅయ్యాం. మనుషులతో ప్రేమను పంచుకుని, నలుగురి ప్రేమ సాధించడమే నిజమైన ఆస్థి అని తెలియజేసిన దర్శకుడు ప్రేమ్ కుమార్ ను అభినందిస్తున్నారు సినిమా చూసిన ప్రేక్షకులు.