హైదరాబాద్: రాష్ట్రంలో రైతుల ప్రయోజనాలను పరిరక్షించడంలో కాంగ్రెస్ ప్రభుత్వం విఫలమైందని, బాధ్యతారాహిత్యంగా వ్యవహరిస్తోందని బీఆర్ఎస్ వర్కింగ్ ప్రెసిడెంట్ కెటి రామారావు శుక్రవారం మండిపడ్డారు. కాళేశ్వరం లిఫ్ట్‌ ఇరిగేషన్‌ ప్రాజెక్టు ప్రాధాన్యతను ప్రజలకు వివరించేందుకు మేడిగడ్డ, అన్నారం బ్యారేజీలను బీఆర్ఎస్ పరిశీలిస్తున్నట్లు తెలిపారు.
”ప్రస్తుత యాసంగి పంటల సీజన్‌లో రైతులు పడుతున్న కష్టాలను ప్రభుత్వానికి తెలియజేసేందుకు ఇది మా యాత్ర. మేడిగడ్డ వద్ద దిద్దుబాటు చర్యలు చేపట్టడంలో కాంగ్రెస్ ప్రభుత్వం విఫలమవడానికి గల కారణాలను వివరించాలి’ అని రామారావు మేడిగడ్డకు బయలుదేరే ముందు శుక్రవారం ఇక్కడ అన్నారు. వ్యవసాయ శాఖ మాజీ మంత్రి పోచారం శ్రీనివాస్‌రెడ్డి మాట్లాడుతూ ప్రభుత్వం తక్షణమే మరమ్మతు పనులు చేపట్టి రైతాంగం పట్ల తన నిబద్ధతను నిరూపించుకోవాలని అన్నారు.